Grancipori

"E cussì conforto tua Signoria, lassi grancipori grancigole e conche marine a quelli che non pò havere altro cibo". Da Michele Savonarola - Libreto de tutte le cosse che se magnano, in Biblioteca Italiana degli Studi di Roma "La Sapienza".
I grançipori, i xe na via de mezo fra na masaneta
granda e na granseola picinina. Se li pesca a i "Murazzi" e anca ne le coste de l'Istria, navegando drio tera, propio davissin a la costa, indove che l'acqua la xe limpida e no tanto fonda. Sti grançipori, i resta cuciai arente i sassi, su'l fondo de'l mar, e bisogna ciaparli co riguardo, parché i xe tanto malignasi e i ga el vissio de . . . menar le zate! Defati, par difendarse, i xe boni de dar na tanagiada cussì forte, ma cussì forte, co le do zate che i ga su'l davanti, che i podaria anca destacarve un deo!
E guai andarghe davissin co i pie descalsi; se podaria ciapar un assidente!
Ne i tempi indrio, gera usansa che i pescaori ciapasse sti Grançi co le solite rede de pesse, ma quele bestiasse ghe le rompeva de continuo co la forsa che le ga ne le zate, e no sempre le riussiva de scampar. Desso, sempre par via de'l "progresso", i ga inventà che, soto costa, a tòr i grançipori ghe va i pescaori subacquei, co arnesi resistenti, fati posta par sta spessie de pesca.I grançipori i va lessai come le masanete, in acqua de bogio salada, par 20 minuti. Se li cura come le granseole e se ghe magna la carne e el coralo conzai co ogio, sal e pevare.
La megio stagion par magnarli, saria da marzo a giugno. A la femena de sto granziporo i ghe ciama poressa e la xe tanto più bona de'l mas'cio.
Brano tratto da "A tola co i nostri veci, La cucina Veneziana" di Mariù Salvatori de Zuliani, Franco Angeli Editore.